لو اشتريت اي بلية / بيرنج bearing من السوق هتلاقي علي العلبه بيانات كتير وفيه حرف C وبعده رقم، الرقم دا معناه إيه و هستفيد منه بايه؟
طب سمعت قبل كدا عن بليه السرعات وهل فيه بليه تشتغل في سرعات عاليه وبليه لا؟
طب حصلت معاك قبل كدا إنك تيجي تغير بيرنج ليها نفس المقاسات والابعاد ونفس ال cover وتتلف بعد فتره بسيطه جدا ؟ ولما تيجي تقارنها القديمه تلاقي الاختلاف الوحيد هو الرقم إللي بعد حرف C
⏪ ال C دي اختصار Internal Clearence أو الخلوص الداخلي للبليه ودا معناه إن فيه خلوص أو مسافه بين البلي وكلا من الظرف الداخلي أو الخارجي أو بيسموه البوش (لما بتمسك البليه بتحس بيه)
⏪ ال clearence دا بيكون في الاتجاه ال radial (هتحس بيه لو بتحرك البيرنج لفوق وتحت)وبيكون برضو في الاتجاه ال axial (لو بتحرك البيرنج قدام وورا)
⏪ طب نفهم من كدا إن ال clearence دا عيب في تصنيع البيرنج؟
لا طبعا بالعكس هو مطلوب بشكل كبير في بعض التطبيقات ولو اختارت بيرنج ليها خلوص غير المطلوب منها بتتلف بسرعه
⏪ طب ليه أصلا بحتاج البيرنج يكون ليها خلوص داخلي؟
✅ أولا عشان نسبه الشحط لأن لو البيرنج شحطها عالي او لو العمود محمل هيحصل تداخل بين البيرنج والعمود وبالتالي بيوسع القطر الداخلي للبليه ولو ملقاش خلوص داخلي يحتوي التمدد دا البيرنج هتقفش stuck
هتلاقي ف الصوره ::
إن البلية / البيرنج من غير شحط الخلوص فيها كبير ولما بعملها شحط الخلوص دا بيقل ولما بتشتغل وتسخن الخلوص بيقل آكتر واكتر
✅ اثناء التشغيل طبيعي جدا بيتولد حراره سواء من العمود نفسه أو حتي من البيرنج ودا بيخلي الظرف الداخلي يتمدد أسرع من الخارجي وبالتالي هيحتاج خلوص برضو يحتوي التمدد دا وإلا هتقفش
✅ في حاله السرعات العاليه هضطر اختار بيرنج الخلوص الداخلي ليها كبير لأن السرعات العاليه معناها حراره عاليه وبالتالي تمدد حراري أسرع thermal expansion وبالتالي هتحتاج يكون عندك خلوص داخلي يحتوي التمدد دا وعشان كدا بيتقال ع البيرنج إللي ليها خلوص داخلي كبير أحيانا إنها بليه سرعات
⏪ طب إيه معني الرقم إللي بعد ال C؟
◀️ الخلوص الطبيعي normal بيكون مكتوب عليه N ودا لو نسبه الشحط قليله أو مفيش مصدر للحراره اثناء التشغيل أو السرعات مش عاليه
◀️ لو الرقم دا C2 بعرف إنه أقل من ال normal يعني ولو C1 هعرف إنه أقل من C2 واقل من Normal ودا غالبا مش بنستخدمه كتير
◀️ لو الرقم 3 ودا الأكثر استخداما بعرف إن الخلوص أكبر من الطبيعي N بنسبه بسيطه ودا لأني متوقع حدوث تمدد حراري اثناء التشغيل وبرضو بستخدمها في السرعات المتوسطه
◀️ لو الرقم دا 4 بعرف إن الخلوص أكبر من 3 واكبر م الطبيعي بشويتين بستخدمها في حاله الحرارات العاليه أو الشحط العالي أو السرعات العاليه
◀️ لو الرقم 5 فدا بيكون اعلي خلوص داخلي ممكن ومش بتستخدم كتير غير في السرعات العاليه جدا
https://www.linkedin.com/posts/mohamed-zedan-6b8020123_%D9%84%D9%88-%D8%A7%D8%B4%D8%AA%D8%B1%D9%8A%D8%AA-%D8%A7%D9%8A-bearing-%D9%85%D9%86-%D8%A7%D9%84%D8%B3%D9%88%D9%82-%D9%87%D8%AA%D9%84%D8%A7%D9%82%D9%8A-%D8%B9%D9%84%D9%8A-activity-7113040511837364225-7f5p?utm_source=share&utm_medium=member_desktop