اغلق عليك باب الفتنة ولا تختبر قوتك فيها .. !

[Osama Badr]

اغلق عليك باب الفتنة ولا تختبر قوتك فيها .. !

منحاوطش نفسنا بدايرة كل اللي فيها بعيد عن ربنا و نقول بس احنا ملتزمين..
متبقاش كل اللي بتشوفه عنينا تصرفات حرام و نقول بس احنا مش هنعمل كده..
متطاوعش حد يقولك هنخرج في مكان و انت عارف ان فيه عُري و شُرب و تقول انا مليش دعوة.. الدنيا مضاقتش بيكو خلاص!
متصاحبش ناس مش بتصلي و مقتنعين ان الصلاة مش فرض و بيستحلّو الحرام و تقول مليش دعوة بيهم.. لإن مسيرك هتستحل زيهم حاجات و هتتأثر أو هتكسل في صلاتك او هتأخرها في يوم، و ممكن تقطعها خالص
و الا مكانش نبهنا الرسول ﷺ حين قال: الرجل على دين خليله، فلينظر أحدكم من يخالل..
مفيش كلام بعد كلام سيدنا محمد ﷺ

اللي بتستنكره انهارده ممكن من كتر ما بتشوفه حوليك تألفه..
متسمعش لحد عايز يشكك في فروض ربنا و يدخل معاك في نقاشات بلا جدوي.. اقفل الباب من الأول..
الزّن علي الودان أمرّ من السحر..
قلبك اللي كان بيقولك لأ اوعي تعمل كده، ممكن يضعف و يزّن عليك تجرّب..
و حتي لو معملتش المعصية هتستصغرها و تستهتر بيها ..
لا تستهين بدقيق الذنوب
ولا تستخف بصغائر المعاصي
فمعظم النار من مستصغر الشرر
ولا تحقرن صغيرة إن الجبال من الحصي...

لو مقفلتش باب الفتن هتفتح مدخل للشيطان انه يقولك ما كلهم ما بيصلوش... ما كلهم بيقلعوا الحجاب.. الايمان في القلب مش لازم تصوم .. اللي بتعمله ده مش زنا ، فيها ايه لما تاخد فلوس حرام بس تصرفها في الخير .... !!

اوعي تتكسف و انت بتبعد عن ناس هتبعدك عن ربنا..
مش هينفعوك ..دول هيسحبوك..
يبقي أي باب فيه مجال للحرمانية نقفله..
لا تختبر قوتك في الفتن عشان محدش كبير عليها الا من رحم ربي...
(منقول)