وصلت خلاص أول صورة رسمية من جيمس ويب، لأدق وأبعد صورة تم تصويرها لأعماق الكون في التاريخ البشري 👇 أهي بكل عظمتها وبهاءها قدام عيونك ❤️
عارف كمية النقط المنورة اللي في الصورة دي عبارة عن ايه؟!.. دي مش نجوم!!.. دي مجرات يا صديقي!!
وكل مجرة واحدة من دول فيها مليارات المليارات من النجوم، اللي زي الشمس بتاعتنا، وحواليهم عدد لا نهائي من الكواكب غير المعروفة، والمجهولة للعلم البشري تمامًا!!
عارف حجم المنطقة اللي تم التقاط الصورة دي منها قد ايه؟!.. لو انت جبت ذرة رمل، ورفعتها قدام عيونك، وفردت دراعك على الآخر عشان ترفعها قدام السما، أهو هو ده بالظبط قطر مساحة الصورة اللي انت شايفها دي!!
كل اللي قدامك ده هو مجرد مساحة أصغر من حجم ذرة رمل، بالمقارنة بحجم السماء والأفق كله!!.. وكل المجرات اللي فيها دي انت شايفها زي ما كانت من 4.6 مليار سنة، عشان الضوء اللي خرج منها استغرق الفترة دي كلها عشان يوصلنا.. مع العلم بإن عمر الكون - المعروف لينا- هو 13.8 مليار سنة تقريبًا!!
بس كل ده مش المبهر.. عارف الإنبهار فعلًا ف ايه؟.. ان الصورة دي حرفيًا أعمق وأدق صورة تم التقاطها للكون البعيد غير المرئي بالنسبالنا، في ترددات الأشعة تحت الحمراء.. وكل اللي انت شايفه قدامك ده، تليسكوب جيمس ويب العظيم لقطه ف أقل من يوم واحد بس أول ما اشتغل!!.. حرفيًا في يوم.. ده مش تهويل، بل هو حقيقة واقعية..
ولسه كل ده بداية.. دي أول صورة بس.. لسه جاي آلاف الصور المبهرة اكتر من دي بمراحل..
عايزك بس تفكر في مدى حجمك وحجم مشاكلك ومشاكل كل اللي تعرفهم وكل اللي سمعت عنهم في حياتك، قدام المشهد ده 👇 وقولي أيه في الدنيا يستاهل اكتر من كده؟! ❤️
بسم الله الرحمن الرحيم، قال تعالى: (سَنُرِيهِمْ آيَاتِنَا فِي الْآفَاقِ وَفِي أَنْفُسِهِمْ حَتَّى يَتَبَيَّنَ لَهُمْ أَنَّهُ الْحَقُّ)
اتفرج على آيات الله سبحانه وتعالى في الأفق 👇 واعمل شير للصورة في كل مكان وكل حتة تقدر عليها، وانشرها لكل اللي تعرفهم، ومنشن لصحابك المهتمين بعلوم الفلك والفضاء، وعرفهم بالإنجاز التاريخي اللي بيحصل ده، وقد ايه الإنسان بياخد خطوة جديدة على سلم الحضارة والعلم..
ومعادنا بكره في المؤتمر الكبير بتاع ناسا، عشان لسه في 4 صور جداد هيتكشف عنهم بكره.. ف متنساش تعمل فولو وسي فيرست، واستنى معايا ❤️
منقول