😁حتى النمر مرهق
معضلة الشاطر"معضلة الشاطر"
و ممكن نسميها "معضلة المحافظة على التميز"
•لماذا يتحتم على الطالب أو الموظف الذي اثبت تميزه أن يستمر على نفس تميزه طالما أن التميز في حد ذاته ليس هو المطلوب؟
•لماذا لا نفرح تنقطع الفرحة التابعة للنجاح بعد الاعتياد عليه؟
•هو ينفع الشاطر يتعب؟
•الضغط هو بداية الانفجار
•Burnout 🔥🧯
*نقطة*
○في أحد المؤسسات التي كنت أعمل بها جالي خبر إن أحد الموظفين مشي والخبر كان بالنسبالي صدمة لأن الشخص ده أنا دايما كنت بثق فيه جدا ومؤمن إنه من أفضل الناس وأكثرهم إخلاصًا في الشغل فحددت معاه معاد إننا نتكلم شوية وبالفعل قعدنا وعرفت إنه ساب المكان وراح مكان تاني والمكان التاني حرفيا لا يقدم أي ميزة تنافسية قصاد المكان الأول بل المرتب على ما أظن كان أقل والشغل كان أكثر اجهادًا بمراحل كثيرة وبعد محاولات لفهم ماحدث وكان السبب هو أن المدير يضغط أكثر من اللازم في أشياء فوق المتطلبات الأساسية للوظيفة وظل يتحمل حتى رحل في صمت.
○موقف تاني حصلي أنا شخصيا لما كنت في ثانوية عامة كان عندي مدرس إنجليزي وكنت أصلا في مدرسة لغات ولكن بدلت مدرستي في آخر سنة فكنت بذاكر الإنجليزي على القد يعني 😅 فالمدرس ده كان بيدي واجب حفظ وبيدي حاجة إضافية "اكسترا" والمفروض اللي بيجاوبها له جايزة وكدا ففضل يسأل الناس في الحاجات الأساسية وجه عندي وقالي هتتسأل في الأسئلة الاكسترا فكان ردي إني مش محضرها وبرضو أصر إنه يسأل فكان ردي الصمت ففضل يديني محاضرة عن إن الطالب الشاطر الاكسترا بالنسباله أساسي مش إضافي وماينفعش تيجي تخيب في تالتة وأنت كنت في أولى وتانية شاطر وكدا 😅
قبل ما أحط تاني نقطة حابب أوضح إن المستر ده من المقربين لقلبي حتى الآن 😁
*نقطة تانية*
ليه دايما الشاطر لازم يفضل شاطر؟ ساعات كدا بحس من الناس إن لما يكون في واحد شاطر بيفضلوا دايما متوقعين منه أعلى مجهود وبينسوا حاجة مهمة جدا جدا إن الشاطر ده بشر بيتعب ويمل ويزهق وبينهار والله مع الضغط وفعلا ده بيسبب ضغط كبير جدا على الناس اللي أصلا شاطرين إنهم لازم دايما يفضلوا يبذلوا مجهود أكتر من كل الناس علشان أيه مش عارف
البني آدم مش لازم يفضل طول حياته يجيب امتياز ولا يفضل طول حياته يطلع الأول
"النجاح لوحده نجاح" قد تكون جملة في منتهى البديهيات ولكن زمان كنت أشوف واسمع الناس اللي بتنجح في المدرسة والكلية بيوزعوا شربات وحاجة ساقعة دلوقتي مفاهيم النجاح اختلفت الله أعلم أيه كل الأسباب ولكن أكيد من الأسباب دي تسرب بعض المفاهيم إن البني آدم لازم يكون ملياردير ولازم يكون الأول على العالم وغيره واللي ماحدش فاهمه تقريبا إن مش الكل هيبقى كدا ومش لازم أصلا يبقو كدا
•في رياضة القوة البدنية powerlifting ورياضة كمال الأجسام bodybuilding هناك مصطلح يسمى بالــ plateau وده عبارة عن إنك بتخبط في حيطة سد ولا عارف تزود أوزان ولا تطور في التمرين وساعتها بيكون الحل الأجمل هو الــ Deload وهو إن التمارين مثلا اللي كنت بتلعب فيها ب100 كيلو تلعبه ب60 كيلو أو حتى تاخد week off وهو إنك تبطل تمرين أسبوع وساعتها الناس تسأل يعني أنا عشان أتطور واتحسن في التمرين أبطل تمرين؟ 🤔 أيوة بالضبط كدا عشان تتطور لازم تريح لأنك لو ماستريحتش بمزاجك هتستريح غصب عنك وساعتها نروح لمصطلح مشهور أكتر في الشركات وبيتم وصف بيه بعض الناس وهو Burnout
طب مين الشخص اللي بقى burnt-out ؟
في 2019 منظمة الصحة العالمية اعترفت بالــ Burnout على إنه ظاهرة مهنية بتحصل لبعض الموظفين في العمل وهو أيوة ممكن يترجم للإرهاق ولكنه أشمل شوية من الإرهاق المتعارف عليه اللي هو الإرهاق الجسدي ولكن ده إرهاق جسدي ومعه إرهاق عاطفي ويمكن أيضا أن يتبعه إرهاق ذهني وبيكون من أعراضه الشعور بالإرهاق طول الوقت وإنك يكون ليك نظرة متشائمة وتكون على طول بتماطل في الديدلاينز بتاعتك طيب برضو ماعرفتش هو ليه ده بيحصل يٌقال إنه بيحصل لما بتتعرض لضغط في الشغل لفترات طويلة شويتين أو يكون أصلا شغلك مرهق جسديا وعاطفيا وتقعد فيه شوية حلوين كدا 😅
طيب هو أنا أيه اللي خلاني أذكر الـ plateau والــ Burnout هنا لأن ببساطة ممكن جدا الشخص المتميز يصاب بالBurnout عادي جدا يا صاح ما أبطال العالم بيصابوا بالـ plateau لأن الموضوع ببساطة خارج عن إرادتهم
طيب حضرتك كدكتور في الجامعة أو مدرس أو صاحب العمل رجاءًا رجاءًا لا تحمل الناس فوق طاقاتهم ولا تعتاد التميز لأن ده هيسبب مشاكل تانية كبيرة منها إنك مش هتفرح أصلا بالتميز يعني سمعت من ناس كتير جدا إنهم عشان إنهم طول عمرهم من الأوائل لما جابوا مجموع عالي في الثانوية العامة لم يلقوا جزء من الحفاوة اللي لقاها زمايلهم اللي تحصيلهم كان أقل منهم وغيرهم من تلقى عقاب رغم إنه ناجح ولكن ليس بالقدر الكافي ليرضي من حوله
ونصيحة ليك يا صاح يا إللي تعبت ريح شوية ويبقى كمل بعد كدا في تحقيق الإنجازات والأهم إنك وأنت شغال في إنجازاتك متنساش إن أهم إنجاز ممكن توصله هو الفوز بالجنة 😁
" فمن زحزح عن النار وأدخل الجنة فقد فاز"
(وكلمة كمان يا صاح على الهامش أنت مش لوحدك فأنا كمان مرهق جدا 😅)
https://www.linkedin.com/pulse/%D9%85%D8%B9%D8%B6%D9%84%D8%A9-%D8%A7%D9%84%D8%B4%D8%A7%D8%B7%D8%B1-fady-sabry-negm/