خلى بالك من المخطط الزمنى لكل مهمة ولا تستغرق الوقت لتحقيق المثالية

[Osama Badr]

من أشهر الطرق اللي ممكن تضيع بيها وقت من غير ما تحس ، إنك تبقى In Time وانت بتعمل مهمة ما ..

والمقصود بنمط الـ In Time في العلوم النفسية ، إنك تندمج في المهمة لدرجة إنك تبقى مش حاسس بالوقت، أو مش حاطط الوقت في حساباتك ... وده بعكس نمط Through Time اللي بنقصد بيه إنك يبقى عندك إحساس عالي بمرور الوقت عليك ...

فتلاقي اللي بيحصل إنك تبدأ مهمة المفروض مثلا تاخد نصف ساعة ... زي إنك تقعد تقرأ حاجة سريعة، أو تخلص ريبورت للشغل، أو تعمل سيرش خفيف على الانترنت ، أو تروق حاجة بسيطة في المكان، إلخ ... فتتفاجئ إنه عدي ساعتين مثلا وانت بتعمل الحاجة اللي المفروض منطقيا تاخد نصف ساعة فقط ...

والمشكلة دي سببها عادة حاجتين ...

1- المثالية في إنجاز المهمة

بمعنى إنك تبقى شايف عملية إنجاز المهمة أبيض وأسود ... يا إما أعملها بشكل مثالي مفيش فيه أي نقص أو غلطة، يا إما أنا كده ما عملتش حاجة أو "كروتت" المهمة وما عملتهاش بضمير ...

فتلاقي نفسك "بتتسحل" مع تفاصيل المهمة، وبتاخد فيها أضعاف الوقت اللي كنت عامل حسابك عليه ...

وعلاج النقطة دي إنك تدرك إن الإتقان درجات ... وإن إنجاز المهمة في وقتها ده في حد ذاته درجة من الإتقان المطلوب ...

2- المثالية في التحرر

بمعنى إنك فعلا ممكن تعمل المهمة براحتك خالص وتاخد كل وقتك ... بس ده في الحقيقة هيبقى على حساب حريتك في حاجات تانية ...

فمحتاج هنا إنك توازن بين درجة الحرية اللي عايزها، ودرجة القيد اللي مستعد تدفعها كثمن في سبيل هذا القدر من الحرية ...

----------------------------------